Posts tagged ‘TV’

IRT(Ice Road Truckers) Deadliest Roads

IRT(Ice Road Truckers) Deadliest Roads -संपदा म्हाळगी-आडकर १०/६/१०
 
 
हि माझी नवी आवडती सीरिअल. अमेरिकेत Ice Road Truckers हि सीरिअल बऱ्यापैकी हिट आहे. अमेरिकेतील हिमाच्छादित व दुर्गम अश्या भागात जीवनावश्यक वस्तू पुरवण्याचे काम हे Ice Road Truckers म्हणजेच ट्रकचालक करतात. बर्फाळ प्रदेशातून जाताना, दुर्गमता, प्रतिकूल हवामान, कठीण रस्ते ह्या सर्वांचा सामना करत आपलं काम चोख पार करत ते इतर ट्रकचालकांना मदत करतात. यंत्रांचं पुढारलेपण घेऊन, निसर्गावर मात करत ते पुढे जातात. पण काही दुर्दैवी चालक काळावर मात करू शकत नाहीत. दुर्गम ठिकाणी इंधन संपल्याने मदतीची वाट पाहत, तिष्ठत बसण्याची अथवा एका चुकीच्या वळणाने बर्फाखाली जलसमाधी मिळाल्याची वेळ काही ट्रक चालकांवर येते.
 
ह्या सीरिअलचा नवा अविष्कार म्हणजे IRT(Ice Road Truckers) Deadliest Roads. हि सीरिअल आवडण्याचं अजून एक कारण म्हणजे हे Deadliest Roads हिमालयातील आहेत. अमेरिकेतून आलेले ३ अनुभवी ट्रकचालक हिमालयाच्या बर्फाच्छादित राशींतून वाट काढत पुढे जाणार आहेत. परक्या देशात, अनोळखी लोकांमध्ये, अनोळखी रस्त्यांवर मार्गक्रमण करताना त्यांचे अनुभव कॅमेरात टिपले जाणार आहेत. ह्या ३ ट्रकचालकांमध्ये लिसा हि एक स्त्री चालक आहे. उरलेले दोघे रिक व अलेक्स हे मुरलेले चालक आहेत. मुरलेले असूनही त्यांना भारतातील रस्त्यांवर येणारे अनुभव वेगळे व लक्षणीय असतील ह्यात वाद नाही. ह्या ट्रक चालकांना ३ क्लीनर्स सोबत दिले आहेत.
असह्य उकाडा (ट्रकमध्ये A.C. नाही हे वेगळे सांगायला नको), रस्त्यावरील गर्दी, दुचाक्यांचे प्रमाण, बेभान वाहतूक, गाय-बैलांसारखे सोबती, चिंचोळे रस्ते, चढते घाट, लेन-ड्राईविंगची सवय ह्या सर्वांमध्ये अमेरिकी ट्राफिक सेन्स किती काळ टिकतो, हे पाहायला नक्की आवडेल. पहिला भाग पाहता, दिल्लीतून निघताना लिसाला मिळालेले un-divided attention, “स्त्री ट्रक चालक” (सुज्ञांनी “गोरी चमडी” असे वाचावे.) आकर्षण जग-जाहीर करून गेले. तिला स्त्री म्हणून येणारे अनुभव पाहण्याची उत्सुकता नक्कीच आहे. छोट्या वाहन चालकांचे वाहन कौशल्य (गाड्या घुसवणे, घाटामध्ये हेड-ऑन कोलीजन टाळण्याचे तंत्र) पाहून रिकने उघडलेली आपली शिवराळ इंग्रजीची थैली, ब्लीपच्या स्वरुपात प्रेक्षकांचे मनोरंजन करते. (माझा प्रश्न हा कि, “हे गोरे टीव्हीवाले (हा वर्णभेदाचा पुरस्कार नव्हे, सोयीस्कर म्हणून वापरलेला शब्द) इंग्रजी शिव्या ब्लीप करू शकतील पण क्लीनर्स/स्पॉटर्सन्नी दिलेल्या इरसाल हिंदी शिव्यांचं काय?”, त्या शिव्यांचं काय होतं हे मला पाहायचं आहे.) ह्या ट्रक चालकांनी आत्तापर्यंत दिल्लीपासून सिमल्यापर्यंत प्रवास पूर्ण केला आहे.
हिमालयाच्या पर्वतरांगा, उंच कडे, खोल शब्द तोकडा पडेल इतक्या खोल दऱ्या, वळणदार रस्ते हे सर्व वर्णन करण्यासाठी पारणं फिटणे, नेत्रदीपक, नयनरम्य वगैरे शद्ब कमीच! पहिला भाग पाहून मनोरंजन झाले हे खरं असलं तरी मनात कुठेतरी भारतीय ट्रकचालाकांबद्दल आदर वाढला. दारू पिऊन ट्रक (for that matter कोणतेही वाहन) चालाविनारयांसाठी हा आदर मुळीच नाही. तो आहे, पोटाला २ वेळेचं मिळण्यासाठी, हाताला रोजगार म्हणून, जीवावर उदार होऊन काम करणाऱ्यांसाठी! सोनाराने कान टोचावे लागतात अशी म्हण आहे.. ह्यावेळी सोनार गोरा होता!
 

मिसेस/मिस्ट्रेस

मिसेस/मिस्ट्रेस -संपदा म्हाळगी-आडकर ६/३०/१०  

नचिकेतने आज ‘मिस्टर काय करतात?’ म्हणून पोस्ट टाकली आणि डोक्यात शब्द आला तो ‘मिसेस’. मिस्टर आणि मिसेस हे शब्द बऱ्यापैकी जोडीने वापरले जातात. भारतात मिसेस हा शब्द सरळसोट बायको ह्याअर्थी वापरला जातो. चारचौघात बायकोला उद्देशून तिचं नाव घ्यायचा जमाना आत्ताचा. त्या आधीची पिढी बायकोला चारचौघात “माझी मिसेस” असंच उद्देशत असे. त्यात चूक काहीच नाही, कारण शब्दकोशात मिसेस (स्पेलिंग Mistress) ह्या शब्दाचा अर्थ married woman (लग्न झालेली बाई) हाच दिलेला आहे.

मी अमेरिकेत आले तेंव्हा घरी असताना TV ने माझी सोबत केली. माझ्या अतिरिक्त आणि बऱ्यापैकी अनावश्यक ज्ञानात भरही टाकली. अमेरिकन TV वर नात्यांवर भाष्य करणारे (भाष्य कसले.. त्यांची खिल्ली उडवणारे), नात्यांमधले दुरावे कमी करण्याचा प्रयत्न करणारे (तसा दिखावा करणारे) असे बरेच कार्यक्रम असतात. आणि दुर्दैवाने प्रसिद्धही असतात. तेंव्हा फावल्या वेळात आणि TV वर अजून पाहण्यासारखे काही नसल्यास तो पाचकळपणा मी पाहत असे. 

त्या कार्यक्रमांत, सहसा २ बाया आणि १ पुरुष किंवा २ पुरुष आणि १ बाई असे येतात आणि कचाकचा भांडतात. विषय काय असणार हे तुम्हाला कळलंच असेल, “विवाहबाह्य/नातेबाह्य संबंध”! हे लोक (म्हणजे कार्यक्रमात सहभागी झालेले)  नेहमी आपल्या बायकोला वाईफ म्हणत, which is OK. इथपर्यंत सगळं ठीक आहे. पण ‘त्या’ दुसऱ्या बाईला म्हणजे ‘पती पत्नी और वोह’ मधली ‘वोह’, थोडक्यात ‘ठेवलेल्या बाईला’ ते Mistress (मिस्ट्रेस) म्हणत. (आता खाल्ल्या का आमच्या इंग्रजी ज्ञानाने गटांगळ्या? तर्खडकर वगैरे तर लोटांगणे घालायचे ह्यांच्यापुढे!) मला बापुडीला प्रश्न पडायचा हा बायकोला मिसेस/मिस्ट्रेस का म्हणत नाहीये? बायकोला सोडून तिसरीलाच का मिस्ट्रेस म्हणतोय म्हणून मला स्ट्रेस यायचा. 🙂 पुढे पुढे कळलं कि खरी गोची काय आहे. थोडक्यात काय आपल्याकडची ‘लग्नाची बायको’ इकडे ‘ठेवलेली बाई’ होते.

“I am OK” is priceless

“I am OK” is priceless  –संपदा म्हाळगी-आडकर ४/२३/१०
 
पोस्टच्या नावांच्या बाबतीत माझा ‘मधुर भांडारकर’ होत चाललाय बहुतेक! आज पण नाव इंग्रजीच! बर आता पोस्टला सुरुवात!

 

मास्टरकार्डची जाहिरात १ ->
सुंदर पोल्का डॉट फ्रॉक घातलेली छोटी मुलगी धावत जात आहे. आवाज: पोल्का डॉट ड्रेस _ _ $
सगळे समूह फोटोसाठी बसले आहेत, आवाज: नवीन मॉडेलचा कॅमेरा _ _$
फोटो काढला जातो, आवाज: आजीच्या वाढदिवसाला समूह फोटो priceless (अमूल्य), ‘देअर आर समथिंग्ज मनी कान्ट बाय, फॉर एव्हरीथिंग एल्स देअर इज मास्टरकार्ड!’
माझ्या मनातली भावना: जाहिरातकर्त्याने काळजाला हात घातला.
 
मास्टरकार्डची जाहिरात २ ->
चेहरा दिसत नाहीये. कॉफीचा मग कोणीतरी टेबलावर ठेवतंय. आवाज: कॉफी _ _ $
हातातलं पुस्तक उचलून तोच मनुष्य उठून चालू लागलाय, आवाज: नवीन खिळवून ठेवणारं पुस्तक _ _$
हातातलं पुस्तक झपकन खाली नेलं जातं, आवाज: आपण Unzipped आहोत हे कळणं priceless (अमूल्य), ‘देअर आर समथिंग्ज मनी कान्ट बाय, फॉर एव्हरीथिंग एल्स देअर इज मास्टरकार्ड!’
माझ्या मनातली भावना: जाहिरातकर्त्याची विनोदवृत्ती काय सॉलिड आहे.
 
वर्षानुवर्षे आपण मास्टरकार्डच्या जाहिराती पाहत आलो आहे. माझ्या मनाच्या भावनांवरून त्या जाहिराती चांगला परिणाम साधतात असं माझंतरी मत आहे. अलीकडेच मास्टरकार्डची एक नवीन जाहिरात पाहण्यात आली.
मास्टरकार्डची जाहिरात ३ ->
एक जोडपं आणि एक माणूस, एका कड्यावर वेगवेगळे उभे राहून सृष्टीसौंदर्य पाहत आहेत. दोन्ही पुरुषांच्या हातात, एकसारखे कॅमेराज आहेत. एकट्या माणसाला कॅमेरा महाग पडलाय. तो जोडप्याच्या कॅमेराकडे वाकून पाहताना कड्यावरून खाली पडतो.
तो पडत असताना आवाज: औषध _ _$, X-ray _ _$, Chiropractor (फिजिओथेरपिस्ट) _ _$
खाली जाऊन पडलेला माणूस दिसत नाही पण त्याचा आवाज येतो “I am OK” (“मी ठीक आहे”).
आवाज: सारखाच कॅमेरा ३०% कमी किमतीला घेणे priceless (अमूल्य), ‘देअर इज अ स्मार्टर वे टू बाय मास्टरकार्ड मार्केटप्लेस!’ – असं काहीसं. 
 

जाहिरातीचा परिणाम OK. जाहिरातीला जे पोहोचवायचं होतं ते तिने पोहोचवलं का? -“हो, मास्टरकार्ड मार्केटप्लेस वापरून वस्तूंवर सूट मिळेल”. जाहिरातकर्त्याचं काम चोख.

माझ्या मनातली भावना: माणूस खाली पडला आणि तो तिकडून ‘I am OK’  असं सांगतोय, हे priceless (अमूल्य) नाही का?

माणूस खाली पडला. त्याच्या दुखण्यावर होणारा खर्च मोजणे ह्याला एक वेळ आपण विनोदाची झालर समजू. पण ‘तो मनुष्य जोडप्याच्या, स्वस्तात मिळालेल्या कॅमेराकडे बघताना खाली पडला’ म्हणून तो कॅमेरा जिथून (मास्टरकार्ड मार्केटप्लेस) घेतला त्याचे महत्व नमूद करणे, मला फारसे पटले नाही. माणसाचा जीव कधीपण priceless (अमूल्य). जाहिरातकाराने देखील तसेच दाखवायला हवे होते. शेवटी ‘सर सलामत तो पगडी पचास’. जीव राहिलं तरच लोक मास्टरकार्डचा वापर करतील. माणूस पडला आणि काहीतरी आयुष्यभराचं दुखणं लागून राहिलं तर तो महाग कॅमेरा घेतल्याचा दु:ख करणार नाही, कड्यावरून पडल्याचं दु:ख करेल.
 
जगात माणसाच्या जीवाची किंमत कमी व्हायला लागलीय का?

माय नेम इज अर्ल

माय नेम इज अर्ल -संपदा म्हाळगी-आडकर २/१८/१०
 
अमेरिकेत फक्त विनोदी मालिका, चित्रपट आणि जाहिराती येणारी एक स्वतंत्र वाहिनी आहे. तिचं नाव TBS. ह्या वाहिनीवर काही अप्रतिम मालिका आणि चित्रपट पाहायला मिळतात. त्यातली एक मालिका म्हणजे “माय नेम इज अर्ल”.

भरत जाधव किंवा मकरंद अनासपुरे ह्यांच्या चित्रपटांइतके, डोके बाजूला ठेऊन पहायची ही मालिका नव्हे. मालिकेचा मूळ संकल्पना भारतीय विचारशैलीतून निर्माण झाल्याने ही मालिका खूप जवळची वाटते.

भारतीय भाषांनी इंग्रजीला बहाल केलेल्या अनेक शब्दांपैकी एक म्हणजे ‘कर्मा’ (Karma) ज्याला आपण ‘कर्म’ म्हणतो. कर्म ह्या संकल्पनेवर आधारित ही मालिका आहे. माणसाला चांगली कर्मे केल्यानेच चांगल्या गोष्टी मिळतात. किंवा “What goes around, comes around!” हा ह्या मालिकेचा गाभा आहे. 

मालिकेचा नायक अर्ल हिकी हा अमेरिकन तरुण. तो भुरटा चोर आहे.  त्यासाठी तो तुरुंगाची हवा ही खाऊन आला आहे.  परिस्थितीने त्याच्यावर चोरी करण्याची वेळ आणली असे नाही उलट चोरी करण्यात काही पाप आहे ह्याचीच त्याला जाणीव नाही.
अर्लचा लहान भाऊ रॅन्डी, कायम त्याची साथ देणारा. डोक्यात जरा कमी.  अर्लची पूर्वीची बायको जॉय. एक मित्र ज्याचं नाव आधी कोणालाच माहित नसतं आणि तो ही कुणाला ते सांगत नाही. हा मित्र एक खेकडे (crab) विकणाऱ्या बारमध्ये काम करत असल्याने सगळे त्याला crabman म्हणत असतात. त्याने नाव न सांगण्याचा मुख्य कारण हे कि ‘अमेरिकेत चालत असलेल्या साक्षीदार सुरक्षितता कार्यक्रमानुसार (विटनेस प्रोटेक्शन प्रोग्रॅम) कोणालाही नाव सांगण्याची त्याला परवानगी नसते.’ नंतर त्याचे नाव  डार्नेल असल्याचं उघड होतं. जॉय आता डार्नेलची बायको आहे. कॅटलायना हि अजून एक मैत्रीण. अर्ल आणि रॅन्डी राहत असलेल्या मोटेलमध्ये मेड आहे. ती अर्लला यादीतील नावे खोडण्यात मदत करते. रॅन्डीला ती आवडत असते. हा थोडक्यात पात्रपरिचय!
 Right click and choose Set as Wallpaper to change your desktop.
डावीकडून कॅटलायना, अर्ल, रॅन्डी, जॉय, डार्नेल
 
मालिकेची सुरुवात अशी- अर्ल हा चोऱ्या करून नुकताच तुरुंगातून बाहेर आला आहे. तो एका निर्जन पेट्रोल पंपावर जाऊन लॉटरीचे तिकीट विकत घेतो. बाहेर येता येता त्यावरील आकडे scratch करतो. आकडे जुळवल्यावर त्याला १ लाख अमेरिकन डॉलर्सची लॉटरी लागल्याचं लक्षात येतं. त्याचा आनंद साजरा करत, नाचत तो रस्त्यावर जातो. ह्या आनंदाच्या भरात त्याला एका मोटारगाडीची धडक बसते आणि तो तितेच बेशुद्ध पडतो. त्याचा लॉटरीचं तिकीटही कुठेतरी उडून पडतं. 

दवाखान्याच्या बिछान्यावर पडलेला असताना, अतिशय जहाल औषधांच्या प्रभावाखाली त्याला तिकीटाची आठवण येते. पण ते सापडत नाही. हे सगळं आपल्या ‘Karma’ मुळे झालं अशी त्याला जाणीव होते. त्यामुळे आत्तापर्यंत केलेल्या दुष्कार्मांची तो ‘यादी’ बनवतो. ज्या ज्या लोकांना त्याच्यामुळे थोडासाही त्रास झाला आहे, त्या सगळ्यांची नावे त्या यादीत आहेत. त्या सर्व लोकांचे नुकसान भरून द्यायचे आणि आपल्या पापांचे क्षालन करायचे तो ठरवतो. ही भरपाई करताना तो कितीतरी हाल सोसतो, गमती-जमती करतो, युक्त्या-क्लुप्त्या वापरतो. भरपाई केल्यावर तो त्या माणसाचं नाव यादीतून खोडून टाकतो. यादीवरून नाव हटेपर्यंत तो त्याचा पाठपुरावा करतो. ह्या नादात, कधी कधी यादीवर अजून काही लोक जमा होतात.

त्याची ही यादीची संकल्पना मला खूपच भावली. ही यादी करून ती खोडून काढण्याची कल्पना किती छान आहे. वरकरणी साधी वाटली तरी खूप काही शिकवणारी. अश्या याद्या करण्याची गरज खरंतर सगळ्यांना आहे. कुणी त्या मनात करतात, कुणी कागदावर! मनातलं कुणाला दिसत नाही. तशी यादी कुणाला दाखवायची गरजही नाही. 
 
अर्ल सोडून वरती सांगितलेली सर्व पात्रं मालिकेची रंगत वाढवतात. रॅन्डी अर्लला यादीमध्ये आणि ती संपवण्यात मदत करतो. भावासाठी पडेल ते काम करतो. आपल्या भोळसट आणि वेडेपणामुळे विनोदाची पखरण करतो. जॉयचा हातभार यादी संपवण्यापेक्षा तीत भर घालण्यात जास्त. पण तिच्या स्त्रीसुलभ कारास्थानांमुळे मजा येते. 

विवाहबाह्य संबंध झाकून (कारण ते मालिकेचा केंद्रबिंदू नाहीत. अमेरिकन विनोदशैलीचा तो मसाला आहे.) एकूणच सशक्त विनोद पाहायचा असल्यास ही मालिका नक्कीच प्रेक्षणीय आहे.

कीपिंग अप विथ रेड्डीज

कीपिंग अप विथ रेड्डीज  -संपदा म्हाळगी-आडकर १/६/१०
 
विशेष सूचना:
हा लेख विडंबनात्मक लिहिला असून, नमूद केलेल्या व्यक्तींचा अथवा संस्थांचा ह्या लेखाशी काहीही संबंध नाही, अगदी बादरायण संबंधही नाही. कोणालाही दुखावण्याचा मनोदय नसून, आनंद वाचनाचा अनुभव घ्यावा.
 
माझ्या टि.व्ही. प्रेमामुळे उत्कृष्ठ ते निकृष्ठ जमातीतले सर्व टि.व्ही. शोज एकदा तरी मी पाहतेच. खरं म्हणजे पाहिल्याशिवाय कसं ठरवणार शो कसा आहे ते? अशाच एका टि.व्ही. शोबद्दल आणि “हा शो जर भारतीय टि.व्ही. वर केला तर???” ह्याबद्दल आज मी लिहित आहे. हा शो ‘E!’ नावाच्या वाहिनीवर येतो. त्यातला E हा एन्टरटेनमेंट (करमणूक) अर्थी असावा. माझ्या नवऱ्याच्या मते, ‘E!’ मधले उद्गारवाचक चिन्ह हे खरंतर प्रश्नार्थक चिन्ह असायला हवे. किंवा E हा एन्टरटेनमेंट साठी नसून Ediotic म्हणून आहे असा त्याचं साफ मत आहे.
 
तर ह्या टि.व्ही. शोचं नाव “कीपिंग अप विथ कार्डाशीअन्स “. कार्डाशीअन हे एक आर्मेनिअन आडनाव आहे. किम कार्डाशीअन हि एक प्रसिद्ध मॉडेल असून ती, तिच्या वेगवेगळ्या कारणांनी चर्चेत असलेल्या २ बहिणी आणि त्यांचे एकत्र कुटुंब ह्यांच्या दैनंदिन जीवनावर आधारित ही सीरिअल आहे. माझ्या नवऱ्याला जरी हा कार्यक्रम वेडेपणाची परिसीमा वाटत असला तरी माझा खूप टाइमपास होतो. ह्या कार्यक्रमाचा शोर्टफोर्म आपण KUK असा करू.
 
US मध्ये तुम्ही रातोरात स्टार होऊ शकता. स्टार होण्यासाठी पर्यायही खूप आहेत. तुम्हाला स्टार व्हायचं असेल तर कोणत्या न कोणत्या मार्गाने मग तो वाम असला तरी टि.व्हि. वर झळकता यायला हवं. मग तुम्ही राष्ट्रीय टि.व्हि. वर गाण्याच्या/नाचण्याच्या कार्यक्रमात चांगले येत नसल्यास, वाईट परफोर्म करा, वास्तववादी शोमध्ये भाग घ्या आणि तिथे प्रेक्षकांच्या डोक्याला वैताग आणा. जेवढा वैताग जास्त तेवढी प्रसिद्धी जास्त. किंवा कुठल्याश्या आंदोलनांमध्ये भाग घ्या, त्याबद्दल टि.व्हि. वर मुलाखत द्या. तुमच्या पाळीव प्राण्याला विचित्र सजवा किंवा तुम्ही स्वतःच काहीतरी विचित्र वेशभूषा करून वावरा. काही करून केंद्रबिंदू राहण्याचा प्रयत्न करा. आणि सगळ्यात शेवटी ह्यावर एक पुस्तक लिहा.
 
सुदैवाने किंवा दुर्दैवाने कार्डाशीअन्सना ह्या पैकी फार काही करावं लागलं नाही. किम कार्डशीअन ही एक सुंदर आणि फेमस मॉडेल आहे. तिच्या कोर्टनी आणि क्लोई ह्या दोन बहिणी काहीश्या कमी सुंदर पण नीटस. त्यांना एक भाऊ आहे, त्याचं नाव मला आठवत नाही. एक कंट्रोल फ्रीक आई आहे. तिचा दुसरा नवरा आणि तीन बहिणींचे येऊन जाऊन असणारे ३ बॉयफ्रेंड्स असा हा परिवार आहे. ह्या ३ बहिणी आणि त्यांचा भाऊ ह्यांची प्रेम प्रकरणे, त्यांचे कपडे, त्यांचे हिंडणे फिरणे आणि जमल्यास काम करण्याचा केलेला प्रयत्न ह्यावर ही मालिका आधारित आहे.
 
भारतीय टि.व्ही. जगताची एकूण क्रिएटीविटी(??) बरीच वेस्टर्न टि.व्ही. वर अवलंबून आहे. KUK कार्यक्रम पाहत असताना, हा जर भारतीय टि.व्ही. ने नेहमीच्या सवयीप्रमाणे कॉपी करायचा ठरवलं तर काय होईल हा विचार सहज माझ्या मनाला चाटून गेला. ‘कीपिंग अप विथ कार्डाशीअन्स’ ऐवजी हा शो ‘कीपिंग अप विथ रेड्डीज’ नावाचा असेल. एक तर नाव ‘क’ वरून सुरु होत असल्याने, एकता कपूरला नावात बदल करण्याची गरज नाही उलटपक्षी क पासून सुरु होणारे नाव आयते मिळाले हा तिच्यासाठी शुभ संकेत आहे.  

 

रेड्डीच का? तर कार्डाशीअन्स बहिणींसारख्या सुषमा, मेघना आणि समीरा ह्या रेड्डी बहिणी वलयांकित आणि सर्वश्रुत आहेत. K’ बहीणी इतक्याचाच खरंतर त्यांच्यापेक्षाही सुंदर आहेत. सारख्या व्यवसायात आहेत. रेड्डींना मुळातच सर्व दाखवायला आवडतं, त्यामुळे सीरिअल इंटरेस्टिंग करायला दिग्दर्शकाला विशेष डोकं वापरावं लागणार नाही.
 
मग काय असेल शोमध्ये –
सुषमा आणि मेघना मिलानमधून मुंबईमध्ये नव्या आयुष्याच्या शोधार्थ येतील. (जश्या कोर्टनी आणि क्लोई मिआमीमध्ये आल्या) त्यांची जीवाची मुंबई आणि मुंबईची मस्ती  सर्व टि.व्ही. वर दिसेल. अधून मधून घरची मंडळी, नवीन मित्र ही येऊन जाऊन दिसतील.
समीरा (किमप्रमाणे) आपल्या क्रिकेटर मित्र श्रीशांत बरोबर चेन्नई मध्ये राहतेय. क्रिकेटरच का?? अहो तो एकच खेळ भारतात सगळ्यात प्रसिद्ध आहे. (K’न्नी नाही का अमेरिकन फूटबॉल प्लेयर बॉयफ्रेंड वापरला.) क्रिकेटर असेल तर त्यालाही वलय असणार. म्हणजे शोची TRP वर नाही का जात?
 
सुषमा आणि मेघना आपले fashion इंडस्ट्रीतले संबंध वापरून आपलं ‘Ever Reddi’ नावाचा ब्रांड सुरु करतील. जसा K’बहिणींनी मायामीत ‘Dash’ सुरु केलं तसं R’बहिणी मुंबई मध्ये ‘Red’ नावाचं एक स्टोअर सुरु करतील. स्टोअरच्या उभारणीच्या वेळेला तिन्ही बहिणींमध्ये इगो टेन्शन आणि भांडणं होतील. ती भांडणं न चुकविता बघण्याकरिता रिमोटसाठी घराघरांमध्ये भांडणं होतील. भांडणं होऊनही समीरा आपल्या सिनेमाच्या बिझी(?) स्केजुलमधून वेळ काढून स्टोअरसाठी आणि बहिणींना सपोर्ट करायला मुंबईत येईल. (प्रेक्षकांचे गुडविल अर्निंग यु नो!) 
 
ज्या दिवशी स्टोअरचे उद्घाटन असेल त्यादिवशी त्यात विकल्या जाणाऱ्या उत्तेजक कपड्यांच्या विरोधात म.न.से आंदोलन करेल. स्टोअरवर मोर्चा निघेल. कार्यकर्ते स्टोअरची तोडफोड करतील. (ते त्यात तज्ञ आहेतच.) सुषमा आणि मेघनाला म.न.से.कडून साडी भेट मिळेल. राज ठाकरे कदाचित २ मुद्दे एका दगडात ठेचण्याचा प्रयत्न करतील (उत्तेजक कपडे आणि परप्रांतीयांचे अतिक्रमण). स्टोअरचे ओपनिंग पुढे ढकलले जाईल.
 
समीरा आपल्या उत्तर भारतीय दिग्दर्शक मित्राच्या (कोण? हे विद्वाना सांगणे न लगे) मदतीने, स्टोअरचे जंगी उद्घाटन करेल. स्टोअर ओपनिंग मिडिया हि सॉलिड कव्हर करेल. मध्यमवर्गीय प्रेक्षक टि.व्ही. वरच स्टोअरमधले कपडे पाहून घेतील, आपली धाव आणि मजल तितकी नाही हे जाणून. समीराचे स्टोअरसाठीचे काम पाहून बहिणी तिला माफ करतील आणि भांडणं विसरतील. 
 
सगळे सुरळीत चालू असताना, समीरा आणि तिच्या क्रिकेटर मित्राचे फिस्कटेल. त्यातून समीराला इतके डीप्रेशन येईल कि ती सिनेमाच्या शूटिंगला जाणार नाही. तिला शूटिंगचं महत्व सांगायला तिची आई येईल. आधीच तिला किती कमी मुव्हीज मिळतात हे तिने ओळखायला नको का?
 
मध्यंतरीच्या काळात मेघना, विजेंदरसिंगच्या प्रेमात पडेल. (क्लोई आणि लमार ची आठवण आली ना?) आता विजेंदर कोण? असं विचाराल. अहो इतक्या लवकर विसरू नका. तो भारताचा एकमेव बॉक्सर ज्याने ऑलिम्पिकमध्ये मेडल मिळवले. तो मुलींमध्ये खूप प्रसिद्ध आहे. त्यामुळे TRP वाढणार. मेघना आणि विजेंदरचा विषय झटपट लग्नापर्यंत पोहोचेल. त्यांच्या लग्नाच्या तयाऱ्या जोरदार चालू असतील. समीरा मात्र अजूनही आपल्या प्रेमभंगाच्या दु:खात अडकली असेल. श्रीशांतची आठवण तिला स्वस्थ बसू देणार नाही. लग्न धूमधडाक्यात आणि गाजवाज्यात पार पडेल.
 
काही दिवस मेघनाचे नव-परिणीत आयुष्य पडद्यावर दिसेल. सुषमा आता एकटीच ‘Red’ चं काम बघत असेल. एका स्पोर्ट्स इवेन्टच्या निमित्ताने समीरा आणि श्रीशांत परत भेटतील. एकत्र येतील. त्यांचे परत येणे खाली चाललेल्या TRP ला नवचैतन्य देईल. आणि मालिकेच्या निर्मात्याला मालिका अजून १०० भागांपर्यंत बिनदिक्कत चालण्याची ग्वाही मिळेल.
 
तोपर्यंत K’ बहिणींच्या आगंतुक नवीन जनरेशनची नवीन सीरिअल US मध्ये निघाली असेल.. “कीपिंग विथ K जुनिअर्स”. ती कॉपी करण्याची संधी रेड्डी बहिणी आपल्याला कधी देतील ह्याची प्रतीक्षा निर्माते करू लागतील. 
 

मला भेटलेली स्वर-आशा

watchindia.tv मुळे US मध्ये बसून मराठी टी.व्ही. पाहणं सोपं झालं आहे. २ आठवड्यापूर्वी सारेगमप चा एक अप्रतिम भाग पाहताना, काही आठवणी जाग्या झाल्या. ह्या भागात विशेष अतिथी म्हणून श्री. आशा खाडिलकर आल्या होत्या. भाग खूपच छान झाला. बहारदार लावण्या आणि राहुलचे “दाटून कंठ येतो” वेड लावून गेलं. आशाताईच्या दिलखुलास गाण्याने आणि खुमासदार प्रतिक्रियांमुळे खरी रंगत आली. त्यांचा संगीताचा अभ्यास वाखाणण्याजोगा आहे.  त्यांनी सादर केलेली लावणी, खास करून “चट दे चटक लागी रे”  सुंदरच!

साधारण ८ ते १० महिन्यांपूर्वी PNG च्या US च्या दुकानात त्यांची भेट झाली होती. त्या तिथे सहकुटुंब आल्या होत्या. अतिशय साध्या वेषात होत्या. celebrity असल्याचा कोणताही भपका नव्हता त्यामुळेच त्या फार approachable वाटल्या. त्यांच्याशी २०-२५ मिनिटं बोललो. खूपच साध्या आणि सत्शील वाटल्या. नातीला खूप दिवसाने भेटल्याचा आनंद त्यांच्या चेहऱ्यावरून लपत नव्हता. ऋषीकेश रानडेच्या गायकीपासून सांगली मधल्या सराफान्बद्दल चर्चा झाली. फारच मनमोकळ्या बोलत होत्या. वास्तविक पाहता आमच्या सारखे त्यांना कित्येक लोक भेटत असतील. पण एखाद्या मित्र-मैत्रिणीची आई भेटल्यावर कश्या गप्पा होतील तश्या छान गप्पा झाल्या. PNG च्या दुकानात काहीही खर्च न करता, काही सोनेरी क्षण पदरात पडले.