खरंतर लावणी हा माझा प्रांत नव्हे, पण नटरंग चित्रपटात काही अप्रतिम लावण्या आहेत. त्यामुळे मी एवढी झपाटली गेले कि म्हटलं “आपण एक लावणी लिहून बघू, जमते का?”

नटरंगच्या प्रेरणेतून  लावणी -संपदा म्हाळगी-आडकर १/१३/१०

रंगमहाली परतुनी येता देईन अत्तर विडा
राया आणा सातारी कंदी पेढा ||धृ||
 
जाता सातारला वरचे-वरी,
यावेळी मी येते बरोबरी
एकाला दुसरा असलेला बरा,
मला दाखवा अजिंक्यतारा
नका घेऊ कोणता आढा-वेढा ||१|| राया आणा सातारी कंदी पेढा
 
जाता सातारला शुक्कुरवारी,
धरू पहिली येसटीची गाडी
अन जाऊन कोल्हापुरी,
साज आणि शालू भरजरी
आंबाबाईस जाऊन सोडा ||२|| राया आणा सातारी कंदी पेढा
 
कुणातरी महाबळेश्वरी धाडा,
तिथला मध हाय नामचीन बडा
सगळं करायला वेळ हाय थोडा,
पाचगणी जमायचं नाही मला
आता तुम्हीच सोडवा हा तिढा ||३|| राया आणा सातारी कंदी पेढा